I dërguari i Shtëpisë së Bardhë për dialogun mes Kosovës dhe Serbisë, Richard Grenell, tha se takimi i 27 qershorit mes përfaqësuesve të Prishtinës dhe Beogradit në Uashington, është një mundësi e mirë për zhvillim dhe investime ekonomike.“Shtetet e Bashkuara shpresojnë se liderët në Kosovë dhe Serbi do ta shfrytëzojnë mundësinë e rikthimit në dialog dhe do të nisin një epokë të re të stabilitetit dhe mirëqenies. Njerëzit e këtij rajoni nuk meritojnë asgjë më pak”, citohet të ketë thënë Grenell sipas ambasadës amerikane në Prishtinë. Presidenti i Kosovës, Hashim Thaci vazhdimisht e ka bërë të qartë se shpreson që ky takim mund të rrisë shpresat për një marrëveshje finale mes Prishtinës dhe Beogradit. Këtë e theksoi edhe në daljen e fundit, ku u fokusua gjithashtu edhe tek përbërja e delegacionit, duke thekesuar se delegacioni kosovar udhëton drejt Washingtonit i përgatitur. Ai nuk tha se kush do të jetë pjesë e këtij delegacioni, por shtoi se do të ndihet mirë pranë kryeministrit Avdullah Hoti.