Presidenti i Malit të Zi, Milo Gjukanoviç tha se ky vendi i tij duhet të rrisë pjesëmarrjen e tij në misionin e KFOR-it. Në një konferencë të përbashkët për shtyp nga Brukseli me shefin e NATO-s, Jens Stoltenberg, Gjukanoviç tha se nuk ka arsye që Mali i Zi të mos ketë pjesëmarrje më aktive në KFOR. “Hezitimet janë të natyrës politike. Hezitimet po përpiqen t'i forcojnë ata që janë kundër pavarësisë së Kosovës, të cilët ende mendojnë se ky ka qenë një gabim dhe të cilët përpiqen të kthejnë rrotën e historisë. Unë mendoj se ky është një mision i pamundur dhe nuk duhet t’i nënshtrohemi kësaj politike që na kthen prapa”, tha Gjukanoviç. Ministria e Mbrojtjes e Malit të Zi, ka konfirmuar se nuk planifikon të dërgojë ushtarë në misionin e KFOR-it në Kosovë gjatë këtij viti. Aktualisht, Mali i Zi ka një mision në KFOR, që përbëhet nga një zyrtar ushtarak dhe një zyrtar civil i Ministrisë së Mbrojtjes. Kundërshtime për dërgimin e ushtarëve në misionin e KFOR-it ka pasur edhe nga zyrtarë të partisë në pushtet në Malin e Zi, Fronti Demokratik. Vendimin për pjesëmarrjen e Malit të Zi në misionin e KFOR-it e merr parlamenti malazez, pas nismës së Ministrisë së Mbrojtjes dhe mendimit të Këshillit për Mbrojtje dhe Siguri, të kryesuar nga presidenti i vendit.