Partia Demokratike i kërkon Komisionit Qendror të Zgjedhjeve që të marrë masa administrative ndaj Kryeministrit Edi Rama për gjuhën e përdorur prej tij në fushatë, që sipas PD është seksiste, përfshin fëmijët dhe është ofenduese për kategori të caktuara të shoqërisë. Shkresa është depozituar edhe te Avokati i Popullit dhe Komisionerit për Mbrojtjen nga Diskriminimi, Robert Gajda, si dhe është vënë në dijeni edhe OSBE/ODIHR, delegacioni i BE në Tiranë, dhe UNICEF. Në materialin e depozituar në KQZ, PD citon si bazë të kërkesës deklaratat e Kryeministrit Edi Rama në lidhje me fotot e tij nudo, thirrjet ndaj grave për të lënë burrat që nuk votojnë Partinë Socialiste si dhe fjalët ‘çyryk’ dhe ‘autik politik’, që Rama ka përdorur në këtë fushatë. Për termin ‘autik politik’, Rama kërkoi ndjesë, ndërsa PD kërkon që përveç marrjes së masave administrative ndaj Kryeministrit të hiqen nga televizionet dhe faqet e internetit të gjtiha përmbajtjet problematike.