Tensionet e fundjavës në Kosovë janë vendosur në rend të ditës së seancës së jashtëzakonshme të Komisionit të Mbrojtjes në Parlamentin Federal të Gjermanisë, Bundestag. ‘Para se të gjykoj, dua të informohem në mënyrë më të detajuar’, tha kryetarja e komisionit, Marie-Agnes Strack-Zimmermann për portalin e lajmeve ‘The Pioneer’. Qeveria gjermane ishte shprehur e shqetësuar për situatën në Kosovë që në fillim të javës. Ministrja gjermane e mbrojtjes, Christine Lambrecht, e cila në pranverë vizitoi personalisht Kosovën, tha se "misioni i KFOR-it i drejtuar nga NATO po monitoron gjithashtu nga afër situatën dhe është i gatshëm të ndërhyjë nëse kërcënohet stabiliteti. Bundesëehr-i mbetet i përkushtuar në NATO dhe me KFOR-in për të garantuar një mjedis të sigurt dhe lirinë e lëvizjes për të gjithë njerëzit në Kosovë”, tha Lambrecht. Ushtria gjermane përfaqësohet në Kosovë si pjesë e një operacioni të udhëhequr nga NATO, por aktualisht ka atje vetëm rreth 65 ushtarë. Sipas mandatit të Bundestagut, në rast nevoje në Kosovë mund të dërgohen deri në 400 ushtarë gjermanë. Sipas "Pioneer", në një raport të brendshëm të Bundesëehr-it javën e kaluar, gjendja e sigurisë në Kosovë nuk ishte e kërcënuar dhe situata ishte "e kontrollueshme".