Edhe pse më shumë se 140 shtete e kanë njohur tashmë Palestinën si shtet të pavarur, dhe atyre pritet t'u shtohen edhe Kanadaja, Franca, Britania e Madhe, Danimarka dhe Australia, Gjermania nuk e mbështet këtë ide. Dhe kancelari gjerman, Friedrich Merz, e bëri të qartë këtë. Ndryshe nga vendet e tjera si Kanadaja ose Franca, qeveria gjermane aktualisht nuk planifikon të njohë një shtet të pavarur palestinez – tha ai pas një takimi me kryeministrin kanadez Mark Carney. "Ne nuk do ta mbështesim këtë iniciativë," tha Merz, "aktualisht ne nuk i konsiderojmë të përmbushura në asnjë lloj mënyre kushtet për njohjen e shtetit të Palestinës", tha ai. Kanadaja, Franca, Britania e Madhe dhe Australia kanë deklaruar se do ta njohin një shtet të pavarur palestinez nëAsamblenë e Përgjithshme të OKB-së në shtator. "Nëse kjo do të jetë në agjendën e Asamblesë së Përgjithshme të Kombeve të Bashkuara, ne nuk do ta ndjekim këtë hap" tha Merz. Nuk ekziston asnjë komb në kuptimin e vërtetë të tij, asnjë territor kombëtar palestinez i njohur, asnjë autoritet shtetëror që ofron një qeveri që njihet nga të gjithë", sqaroi më vonë kancelari. "Megjithatë qeveria izraelite nuk duhet ta bëjë të pamundur që një shtet i tillë të krijohet një ditë", shtoi Merz. Zgjerimi i kolonive izraelite në Bregun Perëndimor, për shembull, synon ta bëjë të pamundur formimin e shtetit në të ardhmen" - tha Merz duke shtuar se qëllimi i qeverisë gjermane mbetet një zgjidhje me dy shtete. Më shumë se 140 vende në mbarë botën e kanë njohur tashmë Palestinën si shtet të pavarur, përfshirë edhe disa shtete anëtare të BE-së si Spanja dhe Irlanda. Edhe kryeministrja daneze, Mette Frederiksen, nuk e ka përjashtuar njohjen e një shteti palestinez. "Ne jemi pro," u tha Frederiksen gazetarëve të martën. Megjithatë duhet të sigurohet që ai do të jetë "një shtet demokratik".