Gjermania planifikon të nisë vaksinimin e të gjithë fëmijëve mbi 12 vjec deri në fund të gushtit, thuhet në një projektvendim të Ministrisë Gjermane të Shëndetësisë. Pas një fillimi të ngadaltë të fushatës së vaksinimit kundër COVID-19, Gjermania tashmë ka përshpejtuar imunizimin e popullatës kundër virusit. Me mbi 40 për qind të popullatës prej 83 milionë banorësh që ka marrë të paktën një dozë të vaksinës, vëmendja tashmë është kthyer rreth pyetjes nëse duhet të vaksinohen edhe adoleshentët. Pikërisht për këtë çështje, Kancelarja gjermane Angela Merkel diskutoi të enjten me kryeministrat e 16 shteteve federale gjermane. Opinioni në Gjermani është i ndarë lidhur me këtë temë. Disa ekspertë thonë se për shkak të mungesës së të dhënave lidhur me efektet afatgjate të vaksinimit, do të duhej që të vaksinoheshin vetëm adoleshentët që kanë sëmundje të rënda. Megjithatë, në dokumentin e Ministrisë së Shëndetësisë bëhet e qartë se qeveria dëshiron që adoleshentët nga 12-18 vjeç të jenë vaksinuar të paktën me dozën e parë deri në fund të gushtit. Sipas dokumentit, Gjermania pret që të vaksinojë të paktën 60 për qind të kësaj grupmoshe. Për këtë, do të duhen 3.18 milionë doza të vaksinës, si për dozën e parë po ashtu edhe për atë të dytë. Sipas Institutit Robert Koch, të enjten Gjermania regjistroi edhe 6.313 raste të reja me koronavirus. Në total, ky shtet ka regjistruar mbi 3.66 milionë raste me COVID-19, ndërkaq, 87.995 persona kanë vdekur.