Policia spanjolle po heton vdekjen e një 39-vjecari, trupi i të cilit u gjet brenda skulpturës së një dinosauri. Autoritetet u lajmëruan të shtunën, pasi një burrë dhe djali i tij, ndjenë një erë të rëndë që vinte nga dinosauri që ndodhet në Santa Coloma de Gramenet, një lagje periferike e Barcelonës. Më pas, babai pikasi kufomën përmes një çarjeje në këmbën e stegozaurit. Sipas policisë, burri ishte deklaruar i humbur nga familja e tij, dhe nuk besohet se ndaj tij është kryer ndonjë krim. Pas zbulimit të trupit, në vendngjarje u thirrën tri skuadra zjarrfikëse, të cilat prenë këmbën e dinosaurit për ta nxjerrë atë. Mediat thanë se burri, identiteti i të cilit nuk bëhet i ditur, po përpiqej të merrte telefonin që i kishte rënë brenda skulpturës. Në përpjekje e sipër kishte rënë edhe vetë brenda dhe kishte ngecur kokëposhtë, pa mundur të kërkojë ndihmë. Policia nuk e ka konfirmuar ende këtë version të ngjarjes, dhe po pret rezultatet e autopsisë për të mësuar shkakun e vdekjes. Statuja dekorative është hequr nga vendi që zinte pranë Godinës Kubike të qytetit, ku përdorej si reklamë për një kinema të vjetër.