Policia e Shkodrës ka vënë në pranga 24 vjecarin Isak Mehmedaj, pasi kishte dhënë deklarim të rremë një ditë më parë. Pas hetimit policia zbuloi se i riu është vetëplagosur me armë zjarri në bark, por ka gënjyer se e kanë qëlluar disa persona të tjerë të cilët ai nuk i njihte. Isak Mehmedaj në bashkëpunim me një 20-vjeçar tjetër, kanë fshehur armën në vendin e ngjarjes si dhe kanë inskenuar një variant ndryshe të saj duke u përpjekur të fshehin rrethanat. Në përfundim të veprimeve hetimore, policia ka arrestuar në kushtet e flagrancës Isak Mehmedaj banues ne fshatin Mushan në Shkoder, për veprat penale “Prodhimi dhe mbajtje pa leje e armëve luftarake dhe e municionit” dhe “Veprime që pengojnë zbulimin e së vërtetës”, e kryer në bashkëpunim. Po ashtu u arrestua në flagracë dhe shtetasi tjetër me inicialet G. M., 20 vjeç, banues po në fshatin Mushan, për veprën penale “Veprime që pengojnë zbulimin e së vërtetës”. 24-vjeçari rezulton kushëri i vëllezërve Mehmedaj, ku njëri prej tyre, konkretisht Hydajet Mehmedaj është i dyshuar për vrasjen e të ‘fortit’ të Shkodrës Ridvan Ramazani, ngjarje e ndodhur disa muaj më parë. Hydajet Mehmedaj i cili aktualisht ndodhet në burg, dyshohet se më 28 nëntor 2020, në bashkëpunim me dy persona të tjerë kanë ekzekutuar Ridvan Ramazanin. Hetimi për 24 vjeçarin Isak Mehmedaj po vijon nga prokururia e Shkodrës.