Gazetari bjellorus, Roman Pratasevich, nuk u duk i befasuar për shkallën e ndërhyrjes së autoriteteve për të shuar zërat kritikë, kur vitin e kaluar u lëshua një urdhërarrest ndaj tij, për gjoja organizimin e protestave anti-qeveritare përmes një kanali në Telegram. Ai tha se "nëse njerëzit dërgohen në burg për shprehje të mendimit ndryshe, atëherë çfarë mund të thuhet për median më të madhe bjelloruse?”. Autoritetet bjelloruse ngritën një avion ushtarak për të ulur në tokë aeroplanin civil, i cili ka qenë në rrugë në Vilnius nga Athina më 23 maj, për atë që në fund doli të ketë qenë alarm i rremë për bombë. Kur avioni u ul, policia ndaloi Raman Pratasevich, 26 vjeç, aktivist opozitar dhe gazetar, i cili përballet me akuza në Bjellorusi, për të cilat mund të mbetet 15 vjet në burg. Pasi aeroplani zbriti në Minsk, një udhëtar tha se Protasevich u arrestua menjëherë dhe bagazhet e tij u kontrolluan. "Ne e pyetëm atë se çfarë po ndodhte", tha pasagjeri, për të shtuar se Protasevich "po dridhej" duke i thënë se “ata do të më ekzekutojnë këtu". Më vonë, përmes një videoje Protasevich tha se po bashkëpunon me autoritetet. "Mund të them se nuk kam probleme shëndetësore. Unë vazhdoj të bashkëpunoj me hetuesit dhe po merrem në pyetje në lidhje me organizimin protestave masive në qytetin e Minskut", tha ai në videon e transmetuar nga televizioni shtetëror bjellorus. Në video dukej se ai kishte disa shenja të zeza në ballë. Por si ndodhi që ky gazetar i ri në moshë të bëhej një revolucionar digjital dhe të nxisë zemërimin e autoriteve bjelloruse? Duhet përmendur se ai ka qenë edhe bashkëfitues i çmimit Sakharov të Parlamentit Evropian 2020 për Lirinë e Mendimit. Pratasevich ka qenë bashkëthemelues dhe kryeredaktor i Nexta-Live, një kanal lajmesh i përqendruar në Bjellorusi. Media e tij kishte fituar kredibilitet si një burim alternativ dhe i besueshëm informacioni. Raportimet që kishte bërë ky kanal, kishin zemëruar autoritetet e Bjellorusisë. Kur zgjedhjet e 9 gushtit në Bjellorusi u kundërshtuan si të manipuluara dhe shpërthyen protestat kundër Lukashenkos, media e tij i mbuloi gjerësisht ngjarjet dhe shfaqi dhunën e regjimit bjellorus. Nexta Live u shpall ekstremiste dhe u urdhërua kufizimi i saj në internet. Vetë Pratasevich u akuzua për organizimin e protestave, prishjen e rendit publik, nxitje të urrejtjes si dhe u vendos në një listë mbikqyrjeje terroriste.