Sekretari amerikan i shtetit, Marco Rubio, mbërriti në izrael për të diskutuar armëpushimin e Gazës me kryeministrin e Izraelit, duke nisur kështu një turne në Lindjen e Mesme një ditë pas shkëmbimit të fundit të pengjeve izraelite me të burgosurit palestinezë. Në vizitën e tij të parë në rajon si kryediplomati i Uashingtonit, Rubio do tentojë të shtyjë përpara propozimin e dënuar gjerësisht të presidentit amerikan Donald Trump për të marrë kontrollin e Rripit të Gazës dhe për të zhvendosur më shumë se 2 milionë banorët e territorit, që sipas ekspertëve do të ishte spastrim etnik. Plani parashikon rizhvillimin e territorit bregdetar në "Rivierën e Lindjes së Mesme" pasi e gjithë Gaza u shkatërrua nga më shumë se 15 muaj bombardime izraelite. Kryeministri izraelit, Benjamin Netanyahu, e mirëpriti idenë gjatë vizitës së tij të fundit në Shtëpinë e Bardhë, por udhëheqësit e huaj e kanë kundërshtuar atë. Rubio zbarkoi në aeroportin Ben Gurion pranë Tel Avivit disa orë pasi Hamasi liroi tre pengje izraelite në Gaza në këmbim të 369 të burgosurve palestinezë, shkëmbimi i gjashtë nën armëpushimin e brishtë.