Greqia ka paralajmëruar Turqinë se mund t’ia bllokojë aksesin në një fond të Bashkimit Evropian në fushën e mbrojtjes, nëse Ankaraja nuk ofron garanci se armët nuk do të përdoren për të shënjestruar Athinën. Greqia, vend anëtar i Bashkimit Evropian dhe Turqia fqinje kanë marrëdhënie të tensionuara prej dekadash lidhur me sovranitetin në Detin Egje, dhe së fundmi edhe për shkak të çështjeve të energjisë dhe migrimit. Turqia, vend anëtar i NATO-s, por jo edhe i bllokut evropian, gëzon mundësinë që të ketë akses në programet e BE-së për industrinë e mbrojtjes dhe në programet e përbashkëta për prokurim, në kuadër të Iniciativës së BE-së për Veprim në Siguri, me vlerë 150 miliardë euro. Mirëpo, kryeministri grek, Kyriakos Mitsotakis, tha se vendi i tij nuk do ta lejojë Turqinë të marrë pjesë në skemën e mbrojtjes, nëse vazhdon të kërcënojë me luftë Greqinë dhe vendos në pikëpyetje sovranitetin e saj në Detin Egje. “Greqia nuk do ta lejojë këtë”, tha lideri konservator për televizionin Skai. Turqia kërcënon shpesh me luftë, në rast se Greqia zgjeron në mënyrë të njëanshme veprimet në ujërat e Egjeut. Mitsotakis ka theksuar se duhet pajtueshmëria e 27 vendeve anëtare të BE-së, para se Turqia të ketë akses në fondet e bllokut. “Kërkohet unanimitet”, tha ai. Komentet e tij erdhën disa orë pasi Gjermania tha se kishte miratuar dërgimin e avionëve Eurofighter Typhoon në Turqi. Turqia është në bisedime prej vitesh për blerjen e 40 avionëve të tillë, të cilët prodhohen nga një bashkëpunim mes Gjermanisë, Britanisë, Italisë dhe Spanjës.