Komisioni Evropian ka konfirmuar se Kosova, njëjtë si vendet e tjera të Ballkanit Perëndimor do të kualifikohet për fondet nga Plani i Rritjes i Bashkimit Evropian nëse i përmbush kushtet e kërkuara. Në lidhje me planin 6 miliardë eurosh që u miratua zyrtarisht për Ballkanin, për Kosovën dhe Serbinë, parakusht për të përfituar pagesa nga kjo paketë është angazhimi konstruktiv në normalizimin e marrëdhënieve fqinjësore. Komisioni Evropian kishte vendosur masa ndëshkuese ndaj Kosovës një vit më parë për shkak të përshkallëzimit të situatës së sigurisë në veri të shtetit. Pas masave ndëshkuese, Kosova mbeti jashtë granteve që BE-ja miratoi në korrik të vitit të kaluar, në vlerë prej 2.1 miliardë eurosh. Ndërkohë, autoritetet e Kosovës argumentojnë se i kanë plotësuar të gjitha kushtet për heqjen e këtyre masave.