Ukraina po punon me Byronë Federale të Hetimit të Shteteve të Bashkuara, FBI, dhe me kompani të tjera amerikane, për të mbledhur të dhëna për krimet e mundshme të luftës të kryera nga rusët. Ata po mbledhin informacione për vendet ku mund të kenë ndodhur krimet e pretenduara, thanë zyrtarët e lartë. Autoritetet ukrainase po mbledhin informacione digjitale nga fushëbetejat dhe qytetet ukrainase që janë goditur nga lufta që kur Rusia nisi pushtimin e Ukrainës shkurtin e kaluar, tha Alex Kobzanets, agjent special i FBI-së, i cili më herët ka punuar si atashe ligjor i FBI-së në Ukrainë. “Mbledhja e të dhënave, analizimi i tyre është një fushë ku FBI ka eksperiencë”, tha Kobzanets. Puna përfshin edhe analizimin e informacioneve të marra nga telefonat, analizat e AND-së, por edhe analizimin e pjesëve trupore të viktimave të marra nga fushëbetejat. Agjenti i FBI-së shtoi se ky institucion prej një viti e gjysmë po punon për të ndihmuar Ukrainën që të identifikojë bashkëpunëtorët e rusisë dhe spiunët që operojnë në Ukrainë dhe forcat ruse që kanë operuar jashtë Kievit në fillimin e pushtimit. Kompanitë amerikane të sigurisë dhe zyrtarët e tjerë amerikanë kanë qenë partnerë të rëndësishëm në përpjekjet e Ukrainës për t’iu kundërvënë sulmeve kibernetike ruse, që kanë nisur që nga viti 2015. Ukraina dhe shtetet e tjera kanë akuzuar disa herë Rusinë se ka kryer krime lufte kundër civilëve ukrainas. Por, Rusia ka hedhur poshtë këto pretendime.