Presidenti i Turqisë, Rexhep Taip Erdogan ka pasur një bisedë telefonike me homologun e tij rus, Vladimir Putin këtë të enjte. Lajmin e kanë dhënë mediat turke, teksa dy liderët kanë diskutuar edhe për dërgimin e parë të karburantit bërthamor, në centralin turk të Akuyas. “Gjatë bisedës, dy liderët diskutuan edhe mbi zhvillimin e luftës ruso-ukrainase, por edhe për studimin e marrëveshjes së grurit. Presidenti Erdogan tha se iniciativa të reja mund të përpunohen përmes grupit të punës, të ngritur nga dy vendet”, thuhet në komunikatën e shpërndarë për mediat turke. Turqia është një nga vendet që vijon të ruajë kanale të mira komunikimi me Rusinë, që prej nisjes së luftës në Ukrainë dhe ka tentuar disa herë të ulë palët në tryezë, për të negociuar për paqen. Gjithashtu me ndërhyrjen e Erdogan, u miratua edhe një marrëveshje për ngritjen e një korridori sigurie, për transportin e grurit ukrainas drejt perëndimit. Kjo është dalja e parë publike e presidentit turk, që ku u sëmur dy ditë më parë. Presidenti turk kishte ndërprerë aktivitetin elektoral për shkak të problemeve shëndetësore, megjithatë duket se tashmë është rikuperuar dhe është gati të vijojë agjendën e tij.