Deficiti tregtar u thellua me 17 për qind në muajin shkurt në krahasim me janarin e këtij viti. INSTAT thotë në raportimin periodik se eksportet arritën vlerën e 34 miliardë lekëve, ndërsa importet në 68 miliardë lekë. Po në krahasim me janarin, raporti i INSTAT tregon rritje të eksporteve me 7.3 për qind në muajin shkurt. Megjithatë, faktori kryesor i rritjes së tyre në vlerë është energjia elektrike, pasi periudha përkon me kulmin e prodhimit sezonal dhe eksportimin e tepricës. Ndërkohë, sektori fason vijon rënien për të disatin muaj me radhë. Sipas të dhënave të INSTAT, eksportet e tekstileve dhe këpucëve ranë me 1 për qind nga janari në shkurt. Rritja më e madhe e eksporteve është regjistruar me Kosovën, me gati 64 për qind, ndjekur nga Greqia dhe më pas Gjermania. Sa u takon importeve, Spanja ka regjistruar rritjen më të madhe me 46 për qind, ndjekur më pas nga Kina dhe Greqia.