Prokuroria e Tiranës ka përfunduar hetimet për çështjen penale ndaj Arsen Muskurtit, duke kërkuar dënimin me burgim të përjetshëm për kryerjen e vrasjes për shkak të marrëdhënieve familjare. Ngjarja e rëndë ndodhi më 31 gusht të vitit 2022, kur Arsen Muskurti hyri i armatosur në agjencinë e udhëtimeve “Nour Tours” dhe qëlloi për vdekje vëllanë e tij, Dritan Muskurtin dhe kunatën Nora Muskurtin. Sipas hetimeve të Prokurorisë Tiranë, para kësja ngjarje kishte konflikte të përsëritura familjare, të cilat kishin agravuar në debate të vazhdueshme dhe shantazhe të pretenduara nga autori. Gjatë marrjes në pyetje Arsen Muskurti pranoi krimin duke deklaruar se ishte shtyrë drejt aktit ekstrem nga problematikat me të vëllain, të cilin e akuzoi se ushtronte presion dhe shantazh ndaj tij dhe prindërve të tyre. Konfliktet mes tyre, ndonëse kishin përfunduar edhe në gjykatë, nuk ishin zgjidhur, gjë që shkaktoi edhe tragjedinë familjare. Prokuroria argumenton se autori ka vepruar me paramendim dhe qëllim të qartë për të kryer vrasjen, duke kërkuar dënim maksimal për të.