Dritan Rexhepi, një nga emrat më të kërkuar të drejtësisë shqiptare, është ekstraduar me avion këtë të mërkurë nga Turqia në aeroportin e Rinasit nën masa të rrepta sigurie nga forcat RENEA. Shqiptari i shumëkërkuar Dritan Rexhepi alias Gramos Rexhepi konsidendeoret si shtetas me rrezikshmëri të lartë shoqërore. Dritan Rexhepi u arrestua më 10 nëntor të vitit 2023, në një vilë në Stamboll. Baroni I drogës kishte hyrë në shtetin turk përmes një pasaporte kolumbiane të falsifikuar të regjistruar në emrin e Benjamin Omar Perez Garcia. Turqia e miratoi ekstradimin në Shqipëri të Dritan Rexhepit në shkurt të 2024-ës. 45-vjeçari po gjykohet në mungesë në Gjykatën e Posaçme si porositës i rrëmbimit dhe vrasjes së Jan Prengës, në 17 janar të vitit 2020. Në vitin 2020, GjKKO I caktoi masën e sigurisë “Arrest në burg”, për veprat penale “Rrëmbimi ose mbajtja peng e personit”, kryer në bashkëpunim, ''Fshehja dhe asgjësimi i kufomës'', “Trafikimi i lëndëve narkotike”, "Mbajtja pa leje dhe prodhimi i armëve" dhe “Kryerja e veprave penale nga organizata kriminale dhe grupi i strukturuar kriminal”. Në vitin 2015, Gjykata e Fierit e ka dënuar me 4 vjet burgim, për veprat penale "Falsifikimi i pasaportave" dhe "formularëve".