Zyrtarët shëndetësorë, thonë se të dyja dozat duhet të jenë të një vaksine. Vaksinat anti covid që administrohen aktualisht, duhen të jepen në dy doza në hapësirën kohore të disa javëve. Në SHBA, ku janë duke u shpërndarë vaksinat e kompanive, Pfizer dhe Moderna, zyrtarët shëndetësorë kanë thënë se vaksinat nuk janë të këmbyeshme. Në Angli, ku administrohen vaksinat e kompanive Pfizer dhe AstraZeneca, zyrtarët shëndetësorë, kanë thënë se dozat duhen të jenë në përputhje me njëra-tjetrën. Mirëpo në raste të rralla kur një lloj vaksine nuk është e disponueshme, apo nuk dihet se cila vaksinë i është dhënë pacientit për herë të parë, zyrtarët kanë thënë se mund edhe të jepet cilado vaksinë në dispozicion për herë të dytë. Meqë vaksinat e kompanive Pfizer dhe AstraZeneca fokusohen në një proteinë që mbështjell koronavirusin, ata besojnë se një dozë e gabuar është më mirë sesa mbrojtja e pjesshme, transmeton agjencia e lajmeve AP. Por sidoqoftë, nuk ka një studim të mirëfilltë për këtë cështje. Dilemat për përzierje të vaksinave vijnë në kohën kur kompanitë farmaceutike janë duke hasur në vështirësi për të prodhuar sasi të nevojshme të vaksinave për vendet me të cilat kanë nënshkruar paraprakisht kontrata. Italia ka thënë se do të marrë hapa ligjorë kundër kompanive Pfizer dhe AstraZeneca rreth vonesave në dërgesat e vaksinave, në mënyrë që të sigurojë porosinë e kërkuar dhe të mos përballet me dëme. Dhe të njëjtën gjë ka paralajmëruar edhe Këshilli Evropian. Presidenti i këshillit, Charles Michel, tha të dielën se BE-ja do t’iu kërkojë kompanive farmaceutike që të respektojnë kontratat që kanë nënshkruar për furnizim me vaksina kundër koronavirusit. “Ne planifikojmë t’i shtyjmë kompanitë farmaceutike që të respektojnë kontratat që kanë nënshkruar … duke përdorur rrugët ligjore”, ka thënë Michel. Ai nuk ka përmendur sanksione potenciale, mirëpo ka thënë se BE-ja do të insistojë në transparencë rreth arsyeve të vonesave.