Ky vit do të mbyllet me një normë bazë inters në nivelin prej 2.5 për qind. Vendimi i Bankës së Shqipërisë shkoi në drejtim të mbajtjes së pandryshuar të këtij treguesi, teksa guvernatori Gent Sejko shpjegoi parametrat makroekonomikë që çuan drejt kësaj vendimmarrje. “Portofoli i kredisë shënoi një rritje vjetore prej 14.2% në muajin tetor, duke qëndruar pranë ritmeve të vitit të kaluar, por dukshëm mbi mesataren e viteve të fundit. Në veçanti, vihen re tre zhvillime pozitive: së pari, rritja e qëndrueshme e kredisë për investime, e cila sinjalizon zgjerimin e kapaciteteve prodhuese të vendit; së dyti, rritja e shpejtë e kredisë në Lek dhe rritja e peshës së saj ndaj totalit, çka përmirëson si hapësirën e veprimit të politikës monetare ashtu edhe stabilitetin financiar të vendit; dhe, së treti, cilësia e qëndrueshme e portofolit, e ilustruar nga niveli i ulët i raportit të kredive me probleme, prej 4.3%.” Guvernatori Sejko nënvizoi presionin në tregun e punës për shkak të kufizimeve të fuqisë punëtore.