Ekonomia shqiptare vazhdon trendin e rritjes. Kjo e nxitur edhe nga konsumi si dhe sezoni I mirë turistik. Gjatë vitit 2025 ekonomia shqiptare sipas parashikimeve të një raporti të fundit të publikuar nga Komisioni Evropian pritet të rritet në 3.8%. “Ekonomia shqiptare vazhdoi trendin e fortë të rritjes në gjysmën e parë të vitit 2024, me rritjen reale të prodhimit të brendshëm bruto që u ngjit në 4,1%. Konsumi privat shënoi rritje të lartë (4,4% në tremujorin e parë, i ndjekur nga 6% në të dytin), i mbështetur nga rritja e pagave reale, rritja e fortë e kredisë dhe kushtet akomoduese financiare”, thuhet në raport. Investimet, thuhet më tej në raport, u rritën me shpejt se në vitin 2023. Në analizë është marrë dhe punësimi, për të cilën Komisioni Evropian thotë se do të rritet gjatë viteve 2024-2026. Sipas ekspertëve të komisionit europian, “Pozicioni fiskal i Shqipërisë u përmirësua në vitin 2023, me deficitin e qeverisë të ulur në 1,3% të PBB-së. Në nëntëmujorin e parë të 2024-ës, të ardhurat u rritën me rreth 10% në terma vjetorë, në përputhje me planin buxhetor.”