Një tjetër mjek ka humbur jetën si pasojë e koronavirusit. Doktor Mihal Kerci humbi jetën disa orë më parë pas një jave në terapi intensive. Anestezisti që ka kryer sa e sa operacione në Spitalin Ushtarak në Tiranë nuk mundi të fitojë të vetmen betejë, atë me covid 19. Profesori që njihej me emrin Misha nga të gjithë kolegët e tij prej disa ditësh ishte në gjendje të rëndë për shkak të komplikacioneve që i shkaktoi Covid-19. Kerci është mjeku i 25 që ka humbur jetën si pasojë e koronavirusit që prej fillimit të pandemisë në Shqipëri. Disa orë më parë, pas një jave përpjekjeje, disa herë shpresash, më tej dëshpërimesh mjekët shqiptarë humbën një nga kolegët tanë më të mirë, Kryetarin e Shoqatës së Anestezi-Terapi Intensive. Studentët nuk do të dëgjojnë më leksionet e tij plot shkencë e pasion, pacientët nuk do ta kenë më në momentet më të veshtira të tyre mbi kokë, duke u transmetuar shpresë, besim e qetësi! Anestezi-Reanimacionit shqiptar e Rajonal do t’i mungojë një nga “kolonat” e organizatorët më të vlefshëm të tij, zëri i tij nuk do të degjohet me plot dije e eksperiencë në Konferencat, debatet, diskutimet tona…. Do na mungojë të gjithëve, familjarëve, kolegëve, shokëve, miqve, të sëmurëve që presin të shërohen…qytetarëve në tërësi. Ta kujtojmë gjithmonë ashtu siç ishte në jeten e punen e tij!Ngushëllimet më të sinqerta e të dhimbeshme”, shkruajnë shumë kolegë të tij në rrjetin social facebook.