Zëvendëspresidenti amerikan JD Vance u nis për në Grenlandë ku do të vizitojë një bazë ushtarake amerikane, një vizitë kjo e cilësuar nga Kopenhageni dhe Nuuk-u, kryeqyteti i grenlandës, si një provokim që vjen në mesin e përpjekjeve të Presidentit Donald Trump për të aneksuar territorin danez me pozicion strategjik dhe të pasur me burime. Trump këmbënguli të mërkurën se Shtetet e Bashkuara kishin nevojë për ishullin e gjerë në Arktik për sigurinë kombëtare dhe ndërkombëtare, ndërkohë që më parë ka refuzuar të përjashtojë mundësinë e përdorimit të forcës për ta marrë atë. “Ne duhet ta kemi atë”, tha Trump i cili mori një ditë më parë edhe atë që u duk si mbështetje nga Vladimir Putin në këtë tentativë të tij. Zyrtarët danezë dhe ata lokalë në Grenlandë, të mbështetur nga Bashkimi Evropian, kanë këmbëngulur se SHBA nuk do të marrë ishullin.