Pas aksionit të finalizuar një ditë më parë nga policia e Vlorës ku në një gomone të braktisur në gjirin e Dafinës u sekuestrua një sasi e konsiderushme droge, ekspertët e antidrogës kanë bërë bilancin e saj. Mësohet se në total në gomone gjendeshin 577 drogë, ku pjesa më e madhe ishte kanabis, ndërsa rreth 200 kg ishin në formën e çokollatës. Operacioni në fjalë u realizua në bashkëpunim me forcat Delta dhe me skuadrat e Guardia di Finanza që veprojnë në zonën e Vlorës, në kuadër të kontrollit të territorit me qëllim parandalimin e trafikimit të lëndëve narkotike. Sipas njoftimit të policisë droga që u gjet në gomone, kishte si destinacion Italinë. Ndjekja nga deti dhe toka zgjati disa orë pranë Karaburunit dhe personat që ishin në bord, në pamundësi për t’i shpëtuar ndjekjes së Policisë, tentuan të braktisnin mjetin lundrues dhe të largoheshin, por u kapën dhe u prangosën gjatë ndjekjes nga Policia. Në prangat e policisë si të përfshirë në tentativën për trafikimin e sasisë së kapur kanë rënë Mandi Begaj, Engjellush Mukaj dhe Herman Mucaj. Prokuroria e Vlorës po vijon hetimet për zbardhjen e plotë të tentativës për trafikim të lëndës narkotike, identifikimin dhe kapjen e personave të tjerë të implikuar në këtë ngjarje.