Ky votim me 140 vota, është konsideruar historik…Një faqe e re e drejtësisë shqiptare që në fakt, nuk dëshirohej nga shumë prej atyre që u detyruan të ngrinin kartonin nga presioni i ndërkombëtarëve. Sot, është 10 Maji, dita kombëtare e Drejtësisë. Mbase një moment i përshtatshëm për të bërë disa bilance. Prokuroria e Posaçme Kundër Korrupsionit dhe Krimit të Organizuar konsiderohet si një prej organeve kyç të sistemit, nga e cila pritet goditja e të ashtuquajturve “peshqit e mëdhenj”. SPAK siç të gjithë e njohin, ka nisur nga puna në 20 Dhjetor të vitit 2019. Vetëm pak ditë më parë, kjo prokurori ka zhvilluar analizën e saj të parë vjetore. Në 564 procedime penale të regjistruara, SPAK ka marrë të pandehur gjatë vitit të parë të punës 746 persona. Gjatë një viti, SPAK ka vënë në përgjim 1175 persona si të dyshuar apo persona që kanë dijeni për veprat penale. Puna e SPAK është parë shpesh me skepticizëm, nisur edhe nga disa operacione kur nën akuzë janë vënë policë apo zyrtarë shtetërorë që kanë marrë ryshfet shuma nga 500 lekë.