Bashkimi Europian njoftoi se te enjen mbahet takimi I radhes ndërmjet Kosovës dhe Serbisë në nivel ekspertësh, në kuadër të bisedimeve të lehtësuara nga i dërguari i posaçëm evropian, Miroslav Lajçak. Zëdhënësi i BE-së Peter Stano tha se rendi i ditës do të përcaktohet në prag të takimit. Palët u takuan për herë të fundit më 29 tetor për të diskutuar çështjet e pretendimeve pronësore dhe financiare, por bisedimet përfunduan pa ndonjë përparim. Gjatë javës Lajçak, tha se procesi nuk është i bllokuar dhe takimi i radhës do të mbahet “sapo të krijohen kushtet”. “Unë jam i angazhuar për të lehtësuar bisedimet e për të arritur një marrëveshje gjithëpërfshirëse, me të cilën njëherë e përgjithmonë, do të zgjidheshin të gjitha çështjet e hapura mes palëve dhe të jetë edhe në pajtim me të drejtën ndërkombëtare dhe ligjet e BE-së”, u tha ai anëtarëve të Komisionit për marrëdhënie ndërkombëtare të Parlamentit Evropian, në një debat mbi situatën në Ballkanin Perëndimor, 25 vjet pas Marrëveshjes së Daytonit që i dha fund luftës në Bosnjë. Megjithatë nga ana tjeter theksoi se procesi i bisedimeve është “një rrugëtim i gjatë dhe me shumë pengesa”. Bisedimet Kosovë –Serbi të lehtësuara nga Bashkimi Evropian, që ishin ndërprerë në fund të vitit 2018 për shkak të tarifave të vendosura nga Kosova ndaj mallrave serbe. rifilluan në muajin korrik. Megjithatë të dyja palët vazhdojnë të mbajnë qëndrime të kundërta për tema të ndryshme.