Denocimet e qytetarëve ndaj gjyqtarëve e prokurorëve nuk kanë ndalur as përgjatë periudhës së pandemisë, kur Komisionet e Vetting-ut ndalën aktivitetin. Edhe pse ka pasur një rënie të ndjeshme gjatë muajve të izolimit, janë regjistruar në total 436 kallëzime për 5 muajt e parë të vitit 2020. Ka qenë muaji prill ai që ka shënuar numrin më të ulët të denoncimeve, që korrespondon edhe me kulmin e izolimit. Ndërkaq, në total ka arritur në 4,856 numri i denoncimeve të qytetarëve pranë Komisionit të Pavarur të Kualifikimit që prej vitit 2017, kur ai nisi zyrtarisht aktivitetin. Viti me numrin më të madh të ankesave ka qenë 2018, kur në drejtim të shkallës së parë të Vetting-ut janë dërguar 1858 denoncime nga qytetarët në drejtim të gjyqtarëve e prokurorëve.