Ministri i Diasporës në Shqipëri, Pandeli Majko ka reaguar përmes rrjeteve sociale ndaj komenteve te Ministrit serb të Mbrojtjes, Aleksandër Vulin. Majko thekson se serbët po e përdorin pak si tepër fyerjen ndaj shqiptarëve, ndërsa mesazhine shoqëron me një foto të Sllobodan Milloshevicit, Radovan Karaxhicit e Ratko Mlladicit, tre fytyrat e mizorisë serbe në Ballkan. “Po publikoj një foto, si kujtesë historike, për Ministrin e Mbrojtjes të Serbisë, Aleksandar Vulin, që po përdor fyerjen si “sport” në marrdhënien me shqiptarët. Duhet ti kujtohet, besoj, se cmimi në kohë të vështira është ai më realisti. E kanë pasur 5 milionë dollarë! Sot!… Edhe cmimin e biletës për të vajtur në Uashington duhet ta paguajnë vetë!”, ka shkruar Majko. Vulin reagoi ashpër ndaj marrëveshjes së arritur të premten mes Kosovës dhe Shqipërisë, ku thuhet se Porti i Durrësit do t’i takojë Kosovës. Ai përdori termin e konsideruar përcmues” shqiptari”, duke thënë se kryeministri Edi Rama po vazhdon me përpjekjet e tij për të krijuar një “Shqipëri të Madhe”. Vetë presidenti Aleksandar Vucic u shpreh se është kundër “ruajtjes së konfliktit të ngrirë dhe se po përpiqen të arrijnë një kompromis me shqiptarët”. Ai I bëri këto komente në hapjen e dialogut të tretë për çështjen e Kosovës me përfaqësuesit e Konventës Kombëtare për Bashkimin Europian, konventë kjo që bashkon rreth 700 organizata të shoqërisë civile.