Ka reaguar në mënyrë të mënjehershme Moska zyrtare pas deklaratës së kryeministrit Edi Rama në një intervistë televizive, ku ai tha se aspironte bashkimin e Shqipërisë me kosovën. Zëdhënësja e Ministrisë së Punëve të Jashtme ruse, Maria Zakharova ka thënë se Moska e konsideron të papranueshme deklaratën e Ramës dhe pret një reagim siç e ka quajtur “të përshtatshëm nga Perëndimi”. “Ne e konsiderojmë deklaratën e kryeministrit shqiptar Edi Rama për bashkimin e Shqipërisë dhe Kosovës absolutisht të papranueshme. Promovimi i planeve për krijimin e një Shqipërie të Madhe është në kundërshtim të madh me dispozitat e Rezolutës 1244 të Këshillit të Sigurimit dhe minon stabilitetin në rajon. Është veçanërisht e çuditshme të dëgjosh se shkelja e dokumentit themelor për zgjidhjen e Kosovës deklarohet si qëllimi kryesor i karrierës politike të udhëheqësit të njërit prej vendeve të rajonit të Ballkanit” tha Zakharova, raporton agjencia ruse e lajmeve Tass. Sipas saj, “kjo deklaratë nuk futet në kontekstin e përpjekjeve të përbashkëta nga Beogradi dhe Tirana për të krijuar një treg të vetëm, të cilin ata po e ndërmarrin si pjesë e nismës rajonale “Ballkani i Hapur” së bashku me Shkupin”. “Ne presim një reagim të përshtatshëm nga mentorët perëndimorë të projektit të shtetndërtimit të Kosovës ndaj këtij provokimi të pacipë”, tha Zakharova. Për deklaratën e kryeministrit shqiptar ka reaguar edhe ministri i Mbrojtjes i Serbisë, Aleksandër Vulin, i cili tha se krijimi i “botës serbe” është e vetmja pengesë që sipas tij mund ta ndalë krijimin e “Shqipërisë së Madhe”. Gjatë një interviste në fundjave kreu i qeverisë Rama u pyet nëse synimi i tij është të jetë president i Shqipërisë dhe Kosovës. Ai tha se “Nuk është në planet e mia. Bashkimi Kosovës me Shqipërinë po. Kjo nuk është projekt personal, kjo është aspiratë”.