Situata e pandemisë në Shqipëri po përkeqësohet. Shifrat e larta të të infektuarve, por edhe viktimave kanë bërë që ekspertët të jenë në dilemën e propozimit të një mbylljeje apo jo, për aq kohë sa numri i rasteve po pëson rritje, e po kështu edhe ai i të shtruarve në spital. Frika e një kolapsimi të shërbimit spitalor në vend, duket se ka detyruar institucionet të jenë edhe më vigjilente, ndonëse në harkun e 24 orëve të fundit, ka pasur një bilanc tragjik të viktimave dhe infektimeve. Vetëm në këtë hark kohor kanë humbur jetën nga koronavirusi 7 persona, ndërsa janë regjistruar 241 raste të reja. Ndërkohë, në dy spitalet covid janë shtruar tashmë 319 persona shumë prej të cilëve në terapi intensive dhe intubim. Sipas shifrave zyrtare të Ministrisë rastet pozitive në Shqipëri, që prej 9 marsit ku nisi pandemia janë 20 mijë e 875 raste, prej të cilave 9 mijë e 177 aktive. Fatmirësisht në harkun e 24 orëve janë shëruar 92 persona, duke e çuar numrin total në 11,189, ndërsa numri i viktimave në total ka shkuar në 509.