Rritja e vazhdueshme e cmimeve të hidrokarbureve, por edhe e produkteve të shportës, ka revoltuar sërish qytetarët, të cilët këtë të mërkurë dolën në një tjetër protestë për të kërkuar reagim nga ana e qeverisë. Qindra qytetarë u mblodhën në Sheshin Skënderbej dhe marshuan më pas drejt Kryeministrisë, aty ku u zhvillua edhe protesta. Cmimi i nënproduktit të naftës arriti nivel rekord, ku prej disa ditësh ka stopuar në nivelin 258 lekë/litër. Cmimet e shportës dhe të hidrokarbureve pësuan një rritje të menjëhershme, fill pas konfliktit mes Rusisë dhe Ukrainës. Kjo gjë shkaktoi trazira, ku qytetarët mbajtën protesta për përreth një javë në kryeqytet në muajin mars, për të kundërshtuar rritjen e cmimeve.