Qeveria shqiptare do të auditojë se si janë shpenzuar fondet IPARD, për të cilat zyra antikorrupsion e Bashkimit Europian po heton, ndërsa KE ka pezulluar mekanizmin e ndihmës për vendin tonë. Auditimi, veç analizës financiare do të shtrihet edhe te i gjithë legjislacioni mbi bazën e të cilit janë shpërndarë këto fonde dhe në përfundim do të këshillohet ndërhyrja e nevojshme në ligj, apo rregullore. Për këtë qëllim, Ministria e Financave ka hapur një tender me fond limit 370 mijë euro. Tenderi ka për objekt auditimin dhe identifikimin e risqeve ndaj të cilave janë ekspozuar fondet e Bashkimit Europian gjatë katër thirrjeve të IPARD II. Programi i granteve të BE-së në Shqipëri, IPARD II u zbatua nga viti 2014 deri në vitin 2020. Maksimimi i fondeve të vendosura në dispozicion nga BE për këtë mekanizëm mbështetje për fermerët ishte rreth 71 milionë euro. Por, gjatë zbatimit të tij, zyra e antikorrupsion e BE-së gjeti parregullsi në disbursimin e rreth 33 milionë eurove.