Edhe pse prej javësh ishte lajmëruar anulimi i Paradës së Krenarisë në Beograd, organizatorët e çuan deri në fund mes incidentesh dhe përplasjesh eventin e tyre të përvitshëm. Përplasje të dhunshme u regjistruan mbrëmjen e së shtunës në rrugët e kryeqytetit serb mes anëtarëve të komunitetit LGTBI dhe mbështetësve të ekstremit të djathtë dhe grupeve fetare. Ky event, ishte anuluar nga presidenti Vuçiç disa javë më parë pikërisht për të shmangur skenat e dhunës, por organizatorët kishin vendosur të vijonin me planin e tyre.