Autoritetet në Britani i dhanë të premten dritën jeshile vaksinës anti-covid19 të kompanisë amerikane Johnson & Johnson. Kjo vaksinë, që jepet përmes një doze të vetme, ka përmbushur “të gjitha standardet e sigurisë, kualitetit dhe efikasitetit”, tha Agjencia Britanike e Barnave. Britania do të ketë tashmë në përdorim katër vaksina, me Johnson & Johnson që u shtohet atyre të Pfizer/BioNTech, AstraZenecas dhe asaj të kompanisë Moderna. Agjencia britanike tha se vaksina e Johnson & Johnson ka treguar 67 % efektivitet për të parandaluar infektimin me COVID-19 dhe 85 % për të parandaluar sëmundjen e rëndë ose hospitalizimin. Kjo vaksinë mund të ruhet në frigorifer në temperatura nga 2 deri në 8 gradë Celsius, që sipas rregullatorit britanik, e bën këtë vaksinë “ideale për shpërndarje nëpër azile dhe institucione të tjera”. Megjithatë, autoritetet britanike ende nuk kanë bërë të ditur se cilës grupmoshë do t’i administrohet kjo vaksinë. Ka pasur spekulime se kjo vaksinë mund t’u jepet vetëm të rriturve, pas raportimeve se mund të shkaktojë mpiksje të gjakut. Vitin e kaluar qeveria britanike, kishte porositur 20 milionë doza të kësaj vaksine, pavarësisht se ajo nuk kishte miratuar ende për përdorim. Pothuajse 58 % e popullatës në Mbretërinë e Bashkuar ka marrë të paktën një dozë të vaksinës dhe rreth 35 % është janë vaksinuar plotësisht. Mbretëria e Bashkuar ka thënë se do të vaksinojë të gjithë popullatën e rritur deri në fund të muajit korrik.