Dy persona janë zhdukur në qytetin e Tuzllës në Bosnje-Hercegovinë si pasojë e reshjeve të shumta të shiut që kanë shkaktuar rritjen e nivelit të ujit në lumenjtë e vendit. Bëhet fjalë për një polic dhe një person tjetër që në orët e paradites së të enjtes në përpjekje për t’i shpëtuar policisë, kishte hyrë në shtratin e lumit Jala. Për shkak të reshjeve që vazhdojnë për ditën e të tretë me radhë, në pjesën më të madhe të Bosnje e Hercegovinës lumenjtë kanë dalë nga shtrati. Gjendje më e rënduar raportohet në pjesën veriore dhe veriperëndimore të vendit, ku janë mbyllur disa rrugë kryesore. Në Laktash, afër Banjallukës, janë përmbytur rreth 100 shtëpi. Lumi Bukovica ka çarë argjinaturat rreth orës katër të mëngjesit dhe ka përmbytur lagje të tëra. Sipas Institutit Federal Hidrometeorologjik, reshje intensive shiu priten deri të shtunën, ndërsa më pas parashikohet stabilizim gradual i motit dhe ndërprerje e reshjeve. Në fund të vitit të kaluar, Bosnja u përball më përmbytje vdekjeprurëse gjatë të cilave 27 persona humbën jetën.