Përfaqësuesi i lartë i Bashkimit Evropian për politikë të jashtme dhe siguri, Josep Borrell pas takimit në Këshillin e Ministrave të Punëve të Jashtme të BE-së në Bruksel, tha se i kishte informuar ata për marrëveshjen e arritur mes Kosovës dhe Serbisë, në Ohër. Borrell: Marrëveshja krijon një status quo të re në dialog “Përsa i takon Kosovës dhe Serbisë i informova ministrat për marrëveshjen që arritëm në Ohër. Ky është një moment rëndësishëm në procesin e normalizimit të marrëdhënieve mes tyre, dhe sigurisht që krijon një status quo të re në dialog. Ne nuk do të jemi më - shpresoj - në gjendje krize, por të fokusuar në zbatimin e Marrëveshjes që u pranua më 27 shkurt. Këto marrëveshje kanë hyrë në fuqi me Deklaratën e lëshuar. Nuk u nënshkrua për arsye ligjore, por të dyja palët ranë dakord që deklarata ime ishte një angazhim nga ana e tyre për të përmbushur plotësisht obligimet që rrjedhin nga kjo Marrëveshje dhe Aneksi për zbatimin e saj” Borrell shtoi se dispozitat për të cilat është rënë dakord do të jenë pjesë integrale e rrugëve të Kosovës dhe Serbisë për në BE.