Qindra studentë në Serbi, të përkrahur edhe nga qytetarë tjerë, e kanë kaluar natën në afërsi të Urës së Lirisë në Novi Sad, në kuadër të bllokadës 24-orëshe. Bllokada nisi të shtunën, në ditën kur u mbushën tre muaj nga aksidenti tragjik në këtë qytet ku humbën jetën 15 persona, si pasojë e shembjes së një strehe betoni në stacionin hekurudhor të qytetit. Studentët besojnë se incidenti është pasojë e korrupsionit qeveritar në një projekt të madh infrastrukturor me një kompani shtetërore të Kinës. Në fillim të protestës, studentët bllokuan për tre orë edhe dy urat e tjera të Novi Sadit, Varadin dhe Zhezhel. Mbrëmjen e së shtunës, figura të njohura publike dhe kulturore kanë folur para protestuesve. Protestuesit kanë qëndruar në afërsi të urës, nga frika se ajo mund të mbingarkohej. Bllokada 24-orëshe në Urën e Lirisë përfundon të dielën, por studentët kanë paralajmëruar se ajo mund edhe të zgjatet. Studentëve në Novi Sad u janë bashkuar edhe studentët nga Beogradi, të cilët kanë ecur për dy ditë më këmbë për të mbërritur atje. Në protestë ka pasur edhe qytetarë prej rajoneve tjera të Serbisë.