Vlerësimet e bizneseve për gjendjen financiare dhe shfrytëzimin e kapaciteteve kanë rënë në shumicën e sektorëve të ekonomisë, ndërsa përmirësim është shënuar vetëm në ndërtim, sipas vrojtimit periodik të Bankës së Shqipërisë. Rënia e shfrytëzimit të kapaciteteve është regjistruar në industri, shërbime dhe tregti. E njëjta tendencë është vërejtur edhe në vlerësimet për gjendjen financiare, ku tregtia ka shënuar dobësimin më të madh. Ndërkohë, ndërtimi ka shfaqur ecuri pozitive në të dy treguesit. Kjo tendencë, sipas revistës monitor, përputhet me rënien e besimit në shumicën e sektorëve të ekonomisë gjatë muajit shtator. Sipas të dhënave të INSTAT, edhe rritja ekonomike është ngadalësuar në tremujorin e dytë të vitit, krahasuar me tremujorin e parë. Ekonomia shqiptare vijon të mbështetet kryesisht te konsumi dhe shërbimet, ndërsa sektorët prodhues shfaqin dobësi. Bujqësia vijon tendencën rënëse, ndërsa industria ka dhënë një kontribut negativ në rritjen ekonomike gjatë gjysmës së parë të vitit. Sektori publik ka qenë kontribuuesi kryesor në rritjen ekonomike, ndërsa tregtia, ndërtimi dhe pasuritë e paluajtshme kanë vijuar zgjerimin, të mbështetura edhe nga turizmi dhe kërkesa e jashtme. Megjithatë, varësia në rritje nga këta sektorë dhe dobësimi i prodhimit mbeten shqetësime për qëndrueshmërinë e ekonomisë shqiptare.