Vetëm pak orë pas daljes para gazetarëve të ish kryeministrit Sali Berisha, dhe një ditë pas protestës shokuese para selisë së Partisë Demokratike, kreu i kësaj partie Lulëzim Basha, doli të bënte edhe ai një bilanc të asaj që e quajti një ditë tragjike për demokratët dhe të gjithë shqiptarët. “...Sot është një ditë bilanci, i të djeshmes tragjike për demokratët dhe të gjithë shqiptarët. Ndodhem këtu prej pa pushim që nga ngjarja bashkë me bashkëpunëtorët e mi, nuk mund të ndaj asgjë tjetër me demokratët përveçse trishtimit të thellë për atë që ka ndodhur dje. Sot nuk është ditë për t’u krenuar apo qeshur siç bëri ai që ishte pak më parë. Nuk është ditë për të vallëzuar mbi rrënojat e dhunës…është një ditë për të përsëritur atë që kemi thënë prej kohësh, provat e të cilët janë përballë gjithë shqiptarëve. Qëllimi i vetëm i Berishës është që nëse PD nuk e merrte në mbrojtje, atëherë PD nuk meritonte të ekzistonte…,”