Aleksander Lukashenko hapi zyrtarisht centralin e parë dhe të vetëm bërthamor në Bjellorusi, duke thënë se ky shtet i Europës Lindore “do të kthehet në fuqi bërthamore”.“Stacioni bërthamor pranë qytetit Astravets përbën një hap drejt së ardhmes dhe garantimit të sigurisë së energjisë së këtij shteti”, deklaroi ai. Ndërtuar nga kompania ruse, Rosatom dhe i financuar nga Moska me 10 miliardë dollarë hua, ndërtimi i centralit bërthamor është kundërshtuar nga Lituania, kryeqyteti i së cilës, Vilnus, ndodhet vetëm 50 kilometra larg Astravets. Centrali e tërheq ujin për reaktorët e tij ftohës nga Lumi Nevis, që po ashtu furnizon me ujë të pijshëm Lituaninë. Bjellorusia e kishte nisur aktivizimin e këtij centrali më herët gjatë javës, duke e shtyrë Lituaninë që të ndalonte importin e energjisë elektrike nga shteti fqinj.Ndërtimi i këtij centrali është parë ndryshe edhe në mesin e bjellorusëve, të cilët janë përballur me dëme të mëdha si pasojë e katastrofës bërthamore të Çernobilit në 1986. Një e katërta e territorit të këtij shteti u kontaminua nga aksidenti më i tmerrshëm civil bërthamor në gjithë botën. Inaugurimi erdhi në kohën kur Bjellorusia përballet gati çdo ditë me protesta dhe greva që prej zgjedhjeve të kontestuara presidenciale të 9 gushtit.