Imazhet satelitore nga ishulli rus Novaja Zemlja treguan se këto javët e fundit, atje ka pasur një shtim të dyshimtë të lëvizjeje, përfshirë këtu kamionë të rëndë për lëvizjen e dheut, kontejnerë transporti, ndërtesa të përkohshme banimi, aeroplanë për ngarkesa të rënda, helikopterë dhe anije transporti. Ekspertët që ndjekin me vëmendjen zhvillimin e armëve të Moskës, japin alarmin duke nënkuptuar se të gjitha këto mund të jenë shenjë e faktit që Rusia po bën një testim të ri të raketës lundruese me rreze të gjatë veprimi dhe me energji bërthamore, e njohur si Buravestnik, e cila më parë kishte hasur shumë probleme. “Vendndodhjet operative për këtë sistem janë thuajse të kompletuara. Ky sistem do të bëhet funksional shumë shpejt”, deklaroi Decker Eveleth, hulumtues në Qendrën për Analiza Detare me seli në Uashington, i cili ka analizuar imazhet satelitore të këtyre vendndodhjeve, të realizuara në korrik dhe gusht. Ata kanë avancuar shumë thotë Eveleth, që mendon se me shumë gjasë, ky mund të ketë qenë kontrolli përfundimtar para testimit dhe vlerësimit operativ. Në të njëjtën linjë mendimi është edhe Pavel Podvig, hulumtues për kontrollin e armëve me seli në Gjenevë. “Nuk do të befasohesha nëse provohet se testimi tashmë ka ndodhur”, thotë ai. Raketa, të cilën NATO-ja e ka quajtur Skyfall, është në zhvillim prej më shumë se një dekade. Ajo është një nga disa sistemet e reja mbi të cilat janë përqendruar projektuesit rusë, teksa Kremlini po ndan para për zhvillimin e armëve si pjesë e një gare armësh – kryesisht kundër Shteteve të Bashkuara.