Kamionë, kontejnerë transporti, njerëz, ndërtesa të përkohshme banimi, aeroplanë për ngarkesa të rënda, helikopterë dhe anije transporti janë parë në ishullin rus Novaja Zemlja në Arktik prej disa javësh, nga imazhet satelitore. Sipas ekspertëve, rusët po bëjnë një testim të ri të raketës lundruese me rreze të gjatë veprimi dhe me energji bërthamore, e njohur si Buravestnik Sipas hulumtuesit Decker Eveleth, vendodhjet operative për këtë sistem janë thuajse të kompletuara dhe se po bëhet funksional shumë shpejt. Sipas tij, keto mund të kenë qenë kontrollet përfundimtare para testimit dhe vlerësimit operativ. Raketa, të cilën NATO-ja e ka quajtur Skyfall, është në zhvillim prej më shumë se një dekade. Ajo është një nga disa sistemet e reja mbi të cilat janë përqendruar projektuesit rusë. Në raketat e tjera përfshihet edhe raketa balistike ndërkontinentale Sarmat, raketa që operon me energji bërthamore, por edhe që ka ngarkesë bërthamore Poseidon, si dhe raketa hipersonike e quajtur Avangard.