Parlamenti Europian nënvizon rëndësinë e punës së SPAK kundër korrupsionit dhe dënon çdo përpjekje për të minuar pavarësinë e prokurorisë së posaçme antikorrupsion dhe institucioneve të tjera të drejësisë. Kështu thuhet në draft raportin për Shqipërinë të komisionit të punëve të jashtme, ku ndër të tjera bëhet thirrje për të rritur transparencën dhe për të angazhuar publikun në komunikimin për integrimin në BE. Duke marrë parasysh ndryshimet e korrikut të vitit 2024 në Kodin Zgjedhor, të cilat mundësuan votimin nga jashtë vendit për diasporën Parlamenti Europian nënvizon nevojën për të adresuar dhe zbatuar rekomandimet e OSBE/ODIHR-it dhe Komisionit të Venecias. Në ndërkohë që komisioni i posaçëm parlamentar po punon për ndryshime ligjore kundër dezinformacionit, Parlamenti Europian sjell në vëmendje se çdo rishikim i ligjeve për median duhet të jetë në përputhje me rekomandimet e Komisionit të Venecias dhe të bëhet në mënyrë transparente dhe gjithëpërfshirëse. Gjithashtu vëren se nuk ka pasur përparim në përafrimin e kuadrit ligjor me legjislacionin e BE-së, përfshirë Aktin Evropian për Lirinë e Medias. Në draft raport i bëhet thirrje autoriteteve shqiptare të përshpejtojnë reformat për anëtarësim sa më të shpejtë në BE si dhe i kërkohet Presidentit të Parlamentit Evropian t’ia përcjellë këtë raprot Këshillit, Komisionit dhe autoriteteve shqiptare.