Zyrtarë të Bashkimit Evropian vlerësojnë se deklaratat publike të liderëve të Kosovës dhe Serbisë, ku ata paraprakisht paraqesin kushte, janë pengesë në organizimin e një takimi të nivelit të lartë në Bruksel. Një burim evropian tha se "është ky lloj qëndrimi publik, i të dy liderëve, që paraprakisht tregojnë kushtet e tyre, që edhe po krijon pengesën më të madhe për caktimin e datës së takimit” në Bruksel. Sipas këtij burimi, mbajtja e raundit të ardhshëm të bisedimeve varet nëse liderët nga Prishtina dhe Beogradi “bien dakord për datën e takimit”, pa dhënë më shumë detaje. Presidenti i Serbisë, Aleksandar Vuçiç, tha më herët se do të shkojë në Bruksel kur Prishtina ta formojë Asociacionin e komunave me shumicë serbe. Kjo deklaratë erdhi pasi përfaqësuesi i lartë i Bashkimit Evropian për politikë të jashtme dhe siguri, Josep Borrell, tha se së shpejti do të ketë një takim të ri mes presidentit serb dhe kryeministrit të Kosovës, Albin Kurti, për të vazhduar diskutimet për propozimin e BE-së për normalizimin e marrëdhënieve. Ndërkohë më herët, kryeministri i Kosovës Albin Kurti tha se themelimi i Asociacionit nuk është prioritet i tij, por javën e kaluar ai bëri të ditura gjashtë kushte për formimin e tij.