Presidenti turk Recep Tayyip Erdogan paralajmëroi të enjten Greqinë të tërhiqte sa më parë bazat dhe trupat nga ishujt e Egjeut. Erdogan monitoroi nga afër stërvitjet ushtarake turke që po zhvillohen pranë Izmirit, nga ku kërcënoi Greqinë se do të pendohet nëse vazhdon të sfidojë Ankaranë. Turqia pretendon se Greqia ka ngritur një prani ushtarake në Egje në kundërshtim me traktatet që garantojnë statuset e paarmatosura të ishujve. Ai argumenton se ishujt iu dorëzuan Greqisë me kusht që të mbaheshin të çmilitarizuar. Greqia argumenton nga ana tjetër se Turqia ka keqinterpretuar qëllimisht traktatet në lidhje me forcat e armatosura në ishujt e saj lindorë.