Detyrimet e prapambetura për 2023 nga 61 bashkitë, në rang vendi u ulën me rreth 20%, krahasuar me një vit më parë, sipas raportit “Qeverisja Vendore në Shqipëri”. Totali i detyrimeve të prapambetura për 2023 arrin në vlerën e 4,75 mld lekëve. Pavarësisht ecurisë për reduktimin e detyrimeve të prapambetura, 14 prej 61 bashkive e kanë shtuar vlerën e detyrimeve të prapambetura ku spikasin bashkia Durrës (+200 milionë lekë), bashkia Lezhë (+75 milionë lekë), bashkia Elbasan (+74 milionë lekë) dhe bashkia Klos (+53 milionë lekë). Nga ana tjetër, vërehet ecuri pozitive në shlyerjen e detyrimeve të prapambetura nga bashkia Tiranë, bashkia Dibër, bashkia Kuçovë dhe bashkia Pustec. Ndërsa bashkia Këlcyrë dhe bashkia Patos për të tretin vit radhazi nuk krijojnë asnjë detyrim të prapambetur ndaj palëve të treta. Sipas raportit nga 10 bashkitë me borxhin më të madh, si përqindje e totalit të detyrimeve të prapambetura, kryesojnë bashkitë e Kavajës dhe Tiranës.