Një aksident i rëndë me pasojë vdekjen u regjistrua të mërkurën në mbrëmje në aksin rrugor Lushnje-Fier pranë fshatit Rrapëz. Sipas informacioneve paraprake, një burrë që po lëvizte me biçikletë është përplasur nga një mjet tip taksi. Për shkak të plagëve të marra, ai ka humbur jetën menjëherë në vendngjarje. Viktima është Skënder Maledhi, 70 vjeç, i cili tentoi të kalonte me biçiklete në anën tjetër të autostradës, por u godit nga mjeti taksi. Menjëherë pas njoftimit, në vendin e aksidentit mbërritën shërbimet e Policisë dhe grupi hetimor, të cilët po punojnë për zbardhjen e plotë të rrethanave. Drejtuesi i mjetit Genci Shahini, 52 vjeç, është shoqëruar për veprime të mëtejshme procedurale. Në vendngjarje mbërritën edhe familjarë të viktimës, të cilët, sapo kanë marrë lajmin tragjik, janë shfaqur në gjendje të rënduar emocionale. Policia po heton, ndërsa paraprakisht dyshohet se ngjarja ka ndodhur në kushte të errësirës dhe me pamje të kufizuar.