Policia italiane ka arrestuar 27-vjeçarin shqiptar, Markelian Hoti, vëllai i deputetes së Partisë Demokratike, Elda Hoti, i cili ishte shpallur në kërkim ndërkombëtar për trafik kokaine. I riu shqiptar u kap në një hotel në periferi të Romës, ku qëndronte i paregjistruar, pas një urdhër-arresti evropian për trafik droge nga Amerika e Jugut drejt Evropës. 27-vjeçari shqiptar u kap në zonën Ponte di Nona, në periferinë lindore të kryeqytetit italian, ku ishte fshehur në një hotel bashkë me të dashurën. Ai dyshohet se kishte rol kyç në një organizatë që trafikonte kokainë nga Amerika e Jugut drejt evropiane. Droga mbërrinte në portin e Anversës, në Belgjikë, dhe më pas transportohej me makina luksoze nga Europa Veriore drejt Dubait. Në muajin janar të këtij viti, ndaj vëllait të deputetes demokrate ishte lëshuar një urdhër-arrest evropian për “organizatë kriminale për trafik narkotikësh”, vepër që sipas mediave fqinje, parashikon deri në 15 vite burg. Arrestimi i 27-vjeçarit u bë pas një hetimi të koordinuar nga Interpol dhe skuadra e antidrogës në Romë. Pasi iu verifikua identiteti, ai u dërgua në burg dhe pritet të ekstradohet drejt Belgjikës, ku do të përballet me drejtësinë për akuzat e trafikut të drogës.