Propozimi i degës së Kukësit të Partisë Demokratike për të dalë në zgjedhjet e 24 shtatorit me një kandidat të përbashkët opozitar është mirëpritur nga qendra. Deputetja Jorida Tabaku e konsideron largpamës dhe domosdoshmëri që opozita të jetë e bashkuar. ‘Të kërkosh që opozita të jetë e bashkuar nuk të bën as të shitur dhe as të blerë diku, thjesht tregon përgjegjshmëri politike përballë qytetarëve’, thotë Tabaku. Sipas Tabakut, bashkimi opozitar është oferta më e mirë për qytetarët. Më tej ajo deklaroi se që prej muajit shtator 2022 ka kërkuar përgjegjshmëri, duke shtuar se ka diskutuar mundësinë për të menduar për qytetarët. Gabimet e së shkuarës, vijon Tabaku, duhet të na bëjnë të mësojmë. Ajo shprehet se degradimi i qeverisjes lokale sidomos asaj në Kukës është një mundësi reale për një kandidat që përfaqëson më së miri vlerat e së djathtës.