Ndryshe nga shumë grupeve fetare në botë që janë të ndarë në mendimin nëse duhet marrë apo jo vaksina anti Covid, Bashkësia Islame e Kosovës, nuk ka dilema të tilla, thotë Radio Europa e Lirë. Kjo bashkësi u rekomandon besimtarëve të fesë islame që ta marrin vaksinën, gjithmonë duke respektuar udhëzimet e Institutit Kombëtar të Shëndetësisë Publike. "Ne si institucion do t’i respektojmë vendimet dhe rekomandimet e IKSHPK-së dhe njëherazi do të kërkojmë nga besimtarët e besimit islam që të veprojnë në të njëjtën mënyrë, pra konform rekomandimeve të institucioneve përgjegjëse", thuhet në një deklaratë të saj. Ka pasur qasje të ndryshme ndaj vaksinës nëpër botë, sidomos nga myslimanët për shkak të përmbajtjes së vaksinës. Një numër besimtarësh përfshirë myslimanë në Serbi, nuk e pranojnë vaksinën nga dyshimi se ajo mund të përmbajë xhelatinë derri. Por në një përgjigje që I dha zyra e kompanisë amerikane Pfizer, Radios Evropa e Lirë në Bosnje e Hercegovinë, theksohet se “vaksina e saj është e përshtatshme për veganët”, e që do të thotë se asnjë nga përbërësit nuk ka origjinë shtazore.