Avioni presidencial i diktatorit komunist të Rumanisë, Nikolae Çaushesku, do t’i “nënshtrohet çekiçit”. Avioni i modelit Rombac 1-11, që u përdor nga diktatori gjatë viteve 1986 dhe 1989, do të dalë në ankand më 27 maj, me një çmim fillestar prej 25 mijë eurosh. I prodhuar në Rumani nën licencën e British Aircraft Corporation gjatë viteve ’80, ai konsiderohet si “xhevahiri i industrisë aeronautike rumune”, thotë agjencia e ankandeve Artmark. Përvecse është perdorur nga Çaushesku, avioni me 119 vende, ka vlerë edhe sepse është një nga vetëm 9 të tillë që prodhuan deri në vitin 1989. Me po të njëjtin cmim fillestar, do të dalë në ankand edhe një avion tjetër, i përdorur nga Jon Iljesku, një tjetër personazh kontrovers në Rumanisë. Rombac 1-11, i njohur edhe si Super 1-11, ishte i pari avion civil i prodhuar në Rumani, duke e bërë atë vendin e parë komunist pas Bashkimit Sovjetik që prodhonte një aeroplan pasagjerësh. Çaushesku ishte i pranishëm gjatë fluturimit të tij të parë në vitin 1982. “Duke qenë një nga të paktët modele të prodhuar dhe rëndësinë që ka në historinë teknologjike të Rumanisë, të dy këta avionë janë klasifikuar si thesare të trashëgimisë kombëtare.”, thuhet në deklaratën e agjencisë. Shitja do bëhet në kuadrin e likujdimit të pronave të ish-ndërmarrjes shtetërore “Romavia”. Por, statusi i tyre “thesar kombëtar” do të thotë që avionët nuk duhet të dalin nga Rumania, dhe që pronarët e ardhshëm duhet t’i mirëmbajnë sipas normave. Çaushesku e udhëhoqi Rumaninë nga viti 1965 deri në 1989, kur një revolucion anti-komunist i përgjakshëm i dha fund sundimit të tij. Ai u ekzekutua së bashku me gruan e tij Elena, në dhjetor të vitit 1989. Iljesku, i cili erdhi në pushtet pas Çausheskut, u gjykua për krime kundër njerëzimit për rolin që luajti në kryengritjen e dhunshme.